Nî kûrî mabûrûri marî waatho atî mûûndû o woothe akorwo ooî kûnyiita mûciinga. Rîmwe kwanooneka ta arî nguthi, no kûriingana na ûcogothi woonekeete matukû tûrî, andû nî mareciiria ûndû ûngî.
Mabûrûri Andû Mathoomithagio Kûhûthîra Mîciinga Tene
Ta rîu bûrûri wa Poland ûkoretwo ûgîthoomithia ciana cia cukuru kûrutania na gûcookania mûciinga. Monagia ciana icio cia kuuma mîaka ikûmi na îtatû (13yrs) na ikûmi na îna (14yrs) hau ûguo, nginya kûratha na mûciinga.
Poland yecaanûrire ûguo nî kuona atî Russia no îmîtharîkîre ndagîka o yoothe, na Russia îrî na mbûtû nene na matharaita maingî.
Bûrûri wa Switzerland naguo nî ûkoragwo na irabu cia gûthoomithania kûhûthîra mîciinga, na ciana cia cukuru nî njîtîkîrie kûingîra. Irabu icio igakorwo ta irabu cia mathaako maangî.
No mwanake woothe akinyia mîaka ikûmi na înaana (18yrs), nî harî waatho athoomere ûnjeeci gwa kahiinda, agîcooka gûthiî gûthoomera wîîra wa gîthûûkûmo. Mûndû arîîkia koothi îyo ya ûnjeeci weega, nîetîkagîrio kûinûka na mûciinga waake.
Ûguo nî kuuga atî, bûrûri ûngîhithûkîrwo o rî o rî, no kwanîrîra thirikaari îngîanîrîra, na o mûciî o mûciî ûcomoke mûndû kana eerî methaîte matharaita.
Nî kûrî mabûrûri maangî mahaaragîria andû ake gîtheemba gîkî, ta Finland na Israeli. Mûndû agîkinyia mîaka ikûmi na înaana (18yrs), agathoomera ûnjeeci, kana nîekwenda gûtuîka mûûjeshi kana ca. Bûrûri ta Israeli ndûthuutûkanagia mûirîtu kana mwanake. No mûhaka mûndû woothe athoomere ûnjeeci.
Njîrîmaani nî Gûcookia îreenda Gûcookia Mûbaango wa Imwana Gûthoomera Ûnjeeci Tene
Bûrûri wa Njîrîmaani waatûire na waatho wa anake oothe a mîaka ikûmi na înaana (18yrs) gûthoomera ûnjeeci. Maathomithagio mîeri îtatû (3mths), magacooka magatwarwo mbaaraki magaikara na njeeci iria irî wîîra-inî mîeri îngî îtaandatû (6mths).
No waatho ûcio nî waatharirio mwaka-inî wa 2011, thuutha wa thirikaari kwona atî rîu thaayû ûcaragio na ndeereti (diplomacy) na ti mbaara.
No icaikuhî maûndû nî macenjeetie thî yoothe, kwambîrîirie na Amerika, na rûraaya rwa athûûngû (Europe). Bûrûri ta Russia wookîrire rûciinî rûmwe ûgîtua atî gîcigo kîmwe kîa Ukraine gîîtagwo Crimea nî weega gîtuîke gîake. Ukraine ndîigana kwona bûrûri wî na kaahinya kanenanene ûmîteithie kwîrûmia na Crimea.
Rîu Russia îhaanîîte ta ngui îcamîîte thakame. Yahurumûkîire Ukraine mwaka-inî wa 2022, îkîanjia mbaara nîguo îînyiitîre Ukraine o nayo. No Ukraine yuugîte: Kaba waangûtha ha teeni ngakûgûtha ha ndururu, no tûtiikûreka ûtûtuunye wîyaathi wiitû.
Mûthenya ûngî naguo, President wa Amerika, Donald Trump, nîaranyiitanire na Prime Minister wa Israeli, Benjamin Netanyahu, maraakoria Iran mbaara. Na Trump oorio mbaara nî yaakî, aheanaga aanja mûûndû ataranyiita weega.
Hau nîho hatûmîîte Njîrîmani îtue itua ndîîgûikara îîrigîtwo. Nî îreenda gûcookia ûhoro wa anake aniini gûkorwo na ûmenyo na ûtaaramu wa kîîjeshi, nîguo makorwo tayarî kûrûîrîra bûrûri wao ndagîka o yoothe.
Na hiihi nîûndû wa ûgûrûki ûrîa ûrooneka ûingîrîire atongoria amwe a mabûrûri, Njîrîmani îreenda îgaikaraga yûûî atî îrî na njeeci ya raia îigana ûna mahiinda-inî moothe. Aya nî andû mangiumîra gûteithania na jeshi ya bûrûri Njîrîmani îngîhithûkîrwo nî bûrûri ta Russia kana o ûngî.
Nîkîo thirikaari îraahîtûkirie waatho atî, wî Mûnjîrîmaani, ûngîenda kuuma nja wa bûrûri na nîûrabaanga gûikara mîeri îkîrîîte îtatû, wîîre thirikaari, kûhîtûkîra gîteengo kîrî ho kîa njeeshi. Maabitha arîa eene ûhoro ûcio, no makûhe rûûtha, nawe ûtige waamamenyithia harîa maangîkûruta bûrûri ûngîkûbatara.
O na niingî no makwîre aca, eterera, kûriingana na ûrîa maroona gûikarîîte maûndû-inî makoniî ûgitîri wa bûrûri.
Rîu îno îgîtuîkîîte thî îngî. Andû macookete gûthuura atoongoria, makaaya gûkorwo nî andû a tamaa ya kwonania ûrûme wa mbaara. Ti ta tene ûrîa atoongoria marageragia o ûrîa maahota kwonania ûthitaarabu. Rîu bûrûri o bûrûri nî ûûhîge, ûmenye ûrîa ûûgûikara ûhoro-inî ûkoniî ûgitîri.