Mûthenya wa ira President wa Misiri (Egypt), Abdel Fattah el-Sisi, araiguire ûndû ûraamûmakia. Maraaragia o ûguo na thimû na President wa Ukraine, Volodymyr Zelensky, mûno ûhoro ûkoniî mbaara îno îraathiî na mbere Iran. Na marakîhuutia ûhoro wa biacara gatagatî ka mabûrûri maao meerî.
Hau no mûhaka akorwo Zelensky nîarakîendire kûmenya ûrîa gwathiire, Misiri îgîtiga kûgûra ngano, mbembe, na indo ingî ta icio iria maagûraga kuuma Ukraine mbere ya mwaka wa 2022.
President Fattah arakîmweretha ûrîa maagire njîra ya kûhîtûkîria indo icio, kuuma Russia yaatuthûra mbaara mwaka wa 2022. Na Zelensky agakîona nîguo toondû taûni cia icûa-inî cia iriia gwake Ukraine, ta Mariupol na Kherson kûrîa Misiri maahîtûkagîria indo icio cia mûgûnda, nîciatahîîtwo nî Russia na ikahiingwo kûhîtûkithia meeri.
Ûrîa Misiri îtacookire kûmenya nî atî, gûgîkinya mweri wa mûgwanja mwaka-inî wa 2023, Ukraine nî yaateithîtio nî Ngwatanîro ya Mabûrûri (United Nations) gûcaria njîra ingî cia kûruta magetha maao na nja wa bûrûri. Na kwoguo nîmakoreetwo makîendia indo o na mbaara îgîthiaga na mbere.
Kumbe Russia îtûûrîîte îiyîte mîgûnda-inî ya Ukraine!
Zelensky araakîûria: Na rîu mûgûraga kû indo icio twaamwendagîria? Fattah araakiuga: Twendagîrio nî Russia.
Kumbe Russia yahûûra Ukraine na yeenyitîra matûûra marîa yeenyitîra yaathaga thigari ciake igwe o mûgûnda! Ikagetha ngano îrîa îrî kuo, mbeembe, mbegû cia gûthoondeka maguta ma Sunflower, na mîtheemba ta îyo ya irio, Russia îkeendia!
Zelensky araakîîra mûraatawe: Ûkîmenye mûkoreetwo mûkîgûra magetha maiyîtwo gwitû mûgûûnda.
President Fattah el-Sisi nîarakîiguire aheheenjeka, toondû tiwe ûngîenda Ukraine îkîhinyîrîrio gîtheemba kîu. Misiri na Ukraine matûûrîte marutîîte biacara weega mîaka mîingî. Ta rîu hîîndî îrîa gûtarî na mathîîna ta maya me kuo ma mbaara, Misiri nî îgûragîra Ukraine indo cia mbeca ikîrîîte ndoora mbirioni îmwe o mwaka.
Rîu ira President aya eerî, wa Misiri na wa Ukraine, nîmaraatuire itua atî nîmeegûcookia biacara ûrîa yaatûire, na kûrîa mangîhota mathondathoondeke.
President Fattah arakiuga kîrîa kîao Russia îrîîte gîkinye hau. Araahe Zelensky kîrîîko atî, rîu Misiri îîgûcooka kûgûra ngano, mbeembe, na indo icio ingî kuuma Ukraine.