Italy nî îraremirwo nî kûingîra kîhîtahîtano-inî kîa mûbiira wa magûrû wa thî yoothe, World Cup, thuutha wa gûciindwo nî tiimu ya Bosnia na Herzegovina.
Rîîrî nî ihiinda rîa gatatû Italy kûhootwo ûguo. Nî ta kuuga Italy, bûrûri wanooya gîkombe kîa mûbiira ûyû wa World Cup maita mana, rîu îkwîrorera îrî o haraaya, tiimu mîroongo îna na inyaanya (48 teams) igîciindanîra gîkoombe.
Nîkî Gîcookete Gûtûma Italy Îciindwo ûguo?
Kûriingana na Mûitariano ûmwe ûthuthuuragia maûndû ma mûbiira, Italy îtûrîîte îkwamîire mwîkîre-inî wa tene wa maûndû. Nginya ûrîa mûbiira ûraathomithio ciana irî cukuru, no mûtaratara wa tene ûraarûmîrîrwo.
Ningî mûûndû ûyû akoiga atî, ûûngîthiî ihaaro-inî cia mûbiira bûrûri-inî wa Italy, ûûgûkora indo ngûrû mûno, nginya mîbaaû na itî cia gûikarîrwo.
No Nî Kûrî na Mwîhoko
Andû arîa meendete mûbiira wa magûrû matingîenda kuona Italy îtarî maciindano-inî rîîngî. Kwoguo marî na mwîhoko atî tiimu ya Italy no îrîcooka harîa yatûûrîte ta mîaka mîroongo îîrî mîthiru.
Italy nî tiimu îkuuîte gîkoombe kîa World Cup maita mana, na rîa mûcio yakuuire gîkoombe macindano-inî ma 2006. Andû aingî meendete mûbiira maigîîte Italy hamwe na tiimu ta Germany na Brazil, o na gûtuîka Brazil îcindîîte gîkoombe maita mataano.
Maigîîte mwîhoko maaririkana athaaki manoona eega a Italy, na angî makaganîrwo ûhoro waao; athaaki ta Paolo Rossi, Fabio Cannavaro, Gennaro Gattuso, mûraangîri wa ngoori, Gianluigi Buffon, na angî tao, arîa maatûmire Italy îkaamenyeka mûno ûguo thî yoothe.