Njaanji ûmwe bûrûri-inî wa Amerika, Judge Richard Neon, oigîte atî President ndaagîrîirwo nî gwakûra White House kûûndû kûmwe kana îrî yoothe nîguo amîake ûrîa eekwenda, tondû kûu ti gwake.
Agîkiindîra ûhoro ûcio, njaanji nîaroigire atî White House nî kûrîa President wa Amerika aheetwo nî waatho aikarage na bamîrî yaake, o kahinda-inî karîa arî gîturwa-inî kîa waathani.
Mwaako wa “Ballroom” White House Kûrûûgamio
Judge Leon aroigire ûguo rîrîa aratuaga itua ciira-inî ûrîa ûreheetwo igooti-inî, nîûndû wa mwako President Trump eerîga kwambîrîria ikuru. Trump aambîrîirie gwakithia kînyûûmba kîa ndaaci iria ciîtagwo “ballroom dancing”, no nî kînyûûmba kîngîhûthîrwo na maûndû maangî ma gwîkenia, o na kana mîcemanio.
“Ballroom” îyo îbaangîirwo kûrîa ndoora mirioni magana mana ($400 million), na yaakwo îrîîke mwaka wa 2028 ûtaanathira; Trump arî o gîturwa-inî.
President Kwîrwo Arûmîrîre Waatho
Judge Leon aroigire atî, ti kuuga atî gûtirî hîîndî kûngîongererwo kaûndû ka mwako White House. No kwagîrîire President ahooe ihooya kûrî mbuunge. Congress îîtîkîre kana îrege, na yeenda gwîtîkîra no îceenjie maûndû mamwe President areenda, no weega.
Njaanji nî aroongereire atî, rûûtha no mûhaka rûheanwo nî Congress getha White House îceenjio na njîra o yoothe, gûtakorwo nî haandû hathûûku harathoondekwo (repairs). Na aroiga atî gûtiraamakania kana mbeca cia gwaaka iroima kîgîîna-inî gîa thirikaari, kana mîhuko ya andû binafsi meerutîire.
Kwoguo kahiinda-inî gaaka, kûrî na waatho wa kûrûûgamia mwako ûcio President Trump acookete kûgana akîaria na amemeerekia a moohoro.
Rîu andû meetereire moone kana Trump nîegwathîkîra waatho, kana egûtua njaanji gûtirî ûndû oiga, eere mabuundi mathiî na mbere na wîîra. Ona kana niingî aambe aûrûgamie, aambe aithîrie ndeto cia mbaara îrîa îraathiî na mbere Iran.