Abithaa mûnene (CEO) wa kambûni ya ndege ya Air Canada, Michael Rousseau, nîareekorire agîtiga wîîra o ûguo hubu, thuutha wa thogothogo kuumîra kiumia kîrîa kîraathirire.
Thogothogo îo îraatuthûkire nîûndû nî harî haandû eerîga kwaria rûthiomi rwa gîthûûngû, haandû ha kwaria gîthûûngû na gîbaaranja.
Kîambîrîria kîa Ûhoro Woothe
Kûrî mweri mîroongo îîrî na igîrî kiumia kîrîa kîraathirire, atwarithia eerî a ndege ya kambûni ya Air Canada nî maagîire na mûtino na magîkua. Atwarithia acio a ndege nî Captain Antwoine Forest ûrîa ûraarî wa mîaka mîroongo îtatû (30), na First Officer Mackenzie Gunther, wa mîaka mîroongo îîrî na îna (24).
Ta ûrîa gûkoragwo harî ûûndûire wa mûûndû, andû mwanya mwanya nî màatûmîire baamîrî na araata ndûmîrîri cia macakaya.
Abithaa mûnene wa kambûni (CEO) îyo ya ndege anake acio maraarutagîra wîîra o naake nîatûmire ndûmîrîri ya macakaya.
Agîkiuga ûrîa kaambûni yoorîrwo nî aruti a wîîra a bata. No kahiinda-inî gatarî cîîhî, bûrûri hakuhî woothe waiyûire hûî hûî. Na gîtûmi kîarî atî, mûrûgamîrîri ûyû wa kambûni aheana ndûmîrîri ya macakaya na rûthiomi rwa gîthûûngû tu.
Bûrûri-inî wa Canada, thiomi iria ihûthagîrwo na maûndû ma kîwaabici nî Gîthûûngû na Gîbaraanja. Gûgîgîtuîka atî Rousseau nî ta kûira aira andû a Quebec, na kûrîa guothe kwaragio Gîbaraanja bûrûri-inî wa Canada.
Gûthûûkia mûno, ûmwe wa anake acio maakuire oimîîte Quebec, kûria mûno mûno kwaragio Gîbaraanja.
Ndeto îno nî îracacirio nî mwario wacookire ûgîikio nî Prime Minister wa Canada, Mark Carney. Oigire o nake nîarigwo kîrîa kîîngîtûma CEO wa kambûni arute ndûmîrîri ya macakaya na rûthiomi rûmwe, akaaria Gîthûûngû agatigîrîra Gîbaraanja.
No weega kûgweta atî waabici nene (Headquarter) ya kambûni ya ndege ya Air Canada îkoragwo mûciî-inî wa Montreal, o kûu Quebec.
CEO Gûcûûnga Mûhera
Michael Rousseau nî araarutire ndûmîrîri îngî kûrî bûrûri, araacakaya na bamîrî cia Antwoine na Gunther, aracooka aroiga nî arehûûra mûno nî kuona atî atuîkire o na nîwe ûramûrîkwo mûno moohoro-inî o na kûrî atwarithia a ndege arîa marakuire mûtino-inî.
Aracookire areeretha atî, gîtûmi gîa kwaga kûruta ndûmîrîri ya macakaya na Gîbaraanja nî atî ndooî Gîbaraanja weega. Atî nîakoreetwo akîîruta, no ndarî ahota gûkîaria weega.
Araakiuga atî, nîûndû wa ûrîa aatûma gûtuthûke thogothogo bûrûri-inî, arî CEO na President wa Air Canada, nîatua itua rîa gûtiga wîîra. Na kwoguo nîekwoya ritaaya ya tene, kuumanagia hau ûguo mweri-inî wa mûgwanja mwaka ûyû.
Ûrîa Mûtino Wahanîkire
Captain Antwoine na First Officer Gunther matwarithirie ndege yao weega, kuuma kîwanja-inî kîa Montreal, Canada, o nginya kîwanja-inî kîa LaGuardia, mûciî-inî wa New York, Amerika. No o rîîrî ndege yaanjia kûgûa rî, maabitha makîona kîîndû kabara-inî ka ndege (runway).
Kumbe nî kîroori gîa thima moto gîakorwo gîatûmwo gîgeeterere ndege îngî yoiga nî gûkinya îraakinya na îrî na gathîîna.
O na maabithaa aya a ndege maageria ûrîa mangîaga kûriinga roori îyo, gûtingîahotekekire. O na no mûnyaka ndege îtaamîikarîire biû. Aruti a wîîra arîa maarî thima moto-inî îyo magîgîtwarwo thibitaarî magathoondekwo nguraro. Na andû angî makîrîîte mîroongo îna (40) maarî ndege-inî îyo ya Air Canada o nao nîmagîire nguraro na magîteng’erio thibitaarî.
Waarî mûtino wa kîeha mûno, no andû magagîcookeria Ngai ngaatho nî gûkorwo no andû eerî makuire.