Mûtoongoria wa Amerika, Donald Trump, nî mûraakarie nî mabûrûri marîa makoragwo marî araata a Amerika. Nîmo Ngeretha, Baraanja, Njîrîmaani, na maangî ma rûraaya. Gîtûmi nî toondû, mbaara îrîa îraathiî na mbere Iran yaacaca, matiigana kwîyuumîria gûteithia Amerika.
No nî ta araariganîrwo atî, tiga nî inegene matareenda, o nao nî maarigirwo Amerika nî mûraata ûhaana atîa toondû we ndaameerire rîrîa abaangire gûtharîkîra Iran.
Mabûrûri maya niingî makoona makire o ûguo meerorere ûrîa gûûgûthiî, maamenya atî o na mbuunge ya Amerika no kûigua yaiguire nî kûraatuthûranwo. Trump ndaigana kûgwetera “Congress” ûhoro ûcio wa mbaara îtanaanjia.
Na niingî toondû Trump ndarî wiiki mbaara-inî me na Prime Minister wa Israeli, Benjamin Netanyahu rî, magakîona ti weega maingîrîre wîîra gatagatî na matiûî ûrîa aya eerî mabaangîte kîambîrîria-inî.
Trump Akoreetwo Agîcaambia NATO
Mabûrûri maya Trump akoreetwo araakarîire makoragwo gîkuundi-inî kîmwe na Amerika gîîtagwo NATO, na nî gîkuundi gîa gûteithania hîîndî îrîa bûrûri ûûngîkorwo na thîîna wa ûgitîri, ta gûtharîkîrwo nî bûrûri ûngî.
Trump nîakoreetwo akînyûrûria gîkuundi kîu, na gîtûmi kîmwe nî atî mabûrûri maingî marutaga tûbeeca tûniini hîîndî îrîa Amerika îraruta mbeeca nyiingî. No rîu kwaga gûteithio mbaara-inî îno nî kwongereire Trump marûrû, agagîîta NATO “Gîkuundi kîa iguoya”.
Marûrû Maingî Meerekeirio Ngeretha
Rîrîa mbaara ya Iran yaambîrîirie na Trump akîona atî Iran ndîrî na guoya, aanjirie kuuga atî no eende mabûrûri araata a Amerika mooke mamateithie nîguo mbaara îthiraange. Gwakîa mûthenya ûyû ûngî ahooywo ûhoro nî amemeerekia, akoiga nîguo nîaroigîte atî mabûrûri macio no mooke mamateithie, no to mûhaka. Akoongerera akoiga atî o na Amerika nî îîhoteete.
Kwoguo hau mabûrûri macio nî maatukanagîrwo. Kiumia gîîkî hîîndî kûraarî na mûcemanio ûtarî mûnene mûno wa NATO bûrûri-inî wa Belgium, Trump eehîîte gûcaambia NATO arî o Amerika. Mûthenya ûcio toondû nîarî na mûcemanio wa maminista waabici-inî irî kûrîa akoragwo White House, harîa acaambagîria NATO nîho acaambîirie Ngeretha. Na Ngeretha nîguo bûrûri ûrîa ûkoragwo ûkuhîrîirie Amerika mûno harî ûraata.
Trump agîkîîra Minista aake atî Ngeretha yoigîîte nî îîkûmûhe ndege cia mbaara makoragwo nacio njega mûno, no matiigana gûciiruta. Akîongerera na kînyûrûri: No gûkorwo nî magacindeehera mbaara yaathira. Atananiina ûhoro ûcio akiuga: Ona nî ndege cia nakû, na ciao nî ta ndoori (toys) iriingithanîtio na cia Amerika?
Prime Minister wa Ngeretha Keir Starmer ndaigana kwaria ndeto icio atî eethitûre. Nîoî atî nî kûrî hîîndî ya kûhe maûndû maitho.