Mûnene wa Federal Bureau of Investigations, FBI, Kash Patel, nî mwanîke. Maûndû marîa mûûndû aandîkaga akaiga komiuta-inî kana mûtandao-inî akaûnti-inî ya marûa (E-mail), nîmo maraahingûrirwo, marathoomwo, na maraikio akaûnti-inî îngî andû angî mathoome meenda. O na nî harî mbica andû acio marakuuire na marathiî kwanîka akaûnti-inî yaao.
Mîtugo îyo îraarutirwo nî gîkuundi kîrî ho kîa Iran gîîtagwo “Handala Hack Team”, na nîkîo kîreyuumbûrire. Andû acio a gîkuundi kîu maarîîkia gûikia indo icio cia Kash Patel akaûnti-inî yaao, maracookire maraandîka kaûndû kaangî: atî gîîkî no kîambîrîria.
Hiihi Ûndû ûyû nî Ûkonainie na Mbaara ya Iran?
Kiumia kîu kîraathirire, Kash Patel nîanîrîire atî, gîteengo kîa waatho (Justice Department) nî kîheanîte rûûtha rwa kûhotithia FBI kûharagania mîtandao îrîa ya mîthiingi (web domains) îrahotithagia ataaramu a mîtandao kûhiingûra akaûnti ciene cia mîtandao, na kwandîkîra eene cio maûndû ma kûmahahûra.
O na nîaagwetire atî, andû arîa makoreetwo makîhahûrwo mûno nî andû a kuuma Iran arîa moorîire Amerika, na matiiguithanagia na thirikaari ici cia Ayatollah.
Nî weega kûririkana atî tene Iran na Amerika maarî ndûgû mûno. Hîndî îyo thirikaari ya Iran yatoongoragio nî Shah Mohammad Reza Pahlavi, na mwathanîre ta ûrîa wî Saudi Arabia wa “monarchy”.
Na o na akorwo thuutha wa Shah kûgarûrîrwo thirikaari nîacookire agîkua, mûriû waake wa mbere ûkoragwo Amerika, wîîtagwo Reza Pahlavi, nî arûûmbûyagia mûno maûndû makoniî ûteti.