Mûthaaki wa thenema wa Amerika, Chuck Norris, nîarahuurûkire kiumia kîu kîrathirire, kwî mûthenya wa Kana. Arakuire e na mîaka mîroongo înaana na îtaandatû (86).
Mûtûûrîre wa Chuck Norris
Chuck Norris aciarîirwo taûni îîtagwo Ryan, Kaûntî ya Jefferson, kûûndû gwîtagwo Oklahoma, mwaka-inî wa 1940.
Aarî mûtaaramu wa mathaako ma mûtheemba wa karate ta marîa maathakagwo nî Bruce Lee. Ona anahoota ikoombe na akaheeo ngerenwa nyiingî o mathako-inî macio. Acookire agîtuunga mûthemba waake wa mûthaakîre akîûhe rîtwa, Chun Kuk Do.
Ûtaaramu ûcio waake nî waamûteithirie kûingîra ûthaaki-inî wa thenema cia gûkenia andû, na thenema iria athaakire mîaka-inî ya 1980 ûguo igîtûma agîe na arûmîrîri kana “fans” aingî mûno. Kwanja thenema îîtagwo “Missing in Action” na îngî îîtagwo “Texas Ranger”, nîciendirwo mûno nî andû.
No thenema îrîa yaatûmire amenyekane weega rîa mbere mûciî-inî wa Hollywood kûrîa thenema nene ithoondekagîrwo Amerika, nî îrîa Bruce Lee aamwîtire magîthaaka naake mwaka-inî wa 1972, îîtagwo “The Way of the Dragon”.
Chuck Norris arî mûniinaniini nîaingîrîîte jeshi ya Amerika, akaruta wîîra arî jeshi ya rîera-inî (US Airforce).
Baamîrî ya Chuck Norris
Chuck Norris aahikirie mûirîtu meendanîire o thukuru, wetagwo Dianne Holechek. Aahikanirie e wa mîaka ikûmi na înaana (18), na kîhiko kîu gîgîikara mîaka mîroongo îtatû (30).
Magîcooka gûtigana, Norris na Holechek maarî na ciana igîrî cia imwana. Norris maatûûrire marî araata matîanîîte na mûtumia ûcio waake wa mbere, nginya hîndî îrîa Dianne arakuire mwaka ûcio ûrathirire wa 2025.
Kûrî mwaka wa 1998, Chuck Norris nîahikirie mûtumia wa keerî wîîtagwo Gena O’Kelley, na magîtaanahîrwo na mahatha, kamwana na kairîîtu.
O rîîrî Norris areciiria nî wa ciana inya, nîacomokeirwo nî mûirîtu wa mîaka mîroongo îîrî na îtaandatû (26). Hîîndî îno nî mwaka-inî wa 2004. Mûirîtu agîkîmwîra e na ribooti atî we Chuck Norris nîwe ithe. Makîaranîria magîîtîkanîria ûhoro ûcio. Kwoguo Chuck Norris araatigire mûtumia waake, Gena, na ciana ithaano.