Mûndû ûgwîtwo Joseph Kent wa thirikaari ya Donald Trump nî eerîga gûtiga wîîra kîambîrîria-inî gîa kiumia gîîkî. No rîu kûrooneka ta arakinyîrwo na marûrû.
Ataanatiga wîîra, Kent aratoongoragia gîteengo kîrîa kîgiragîrîria maûndû ma “ugaidi” (Counter-terrorism).
Kûreerîkana atî rîu thigari cia Amerika cia FBI nî cianjîtie kûmûthuthuuria, na agagîtukanîrwo nî ûhoro ûcio.
Marûa-inî maake ma gûtiga wîîra, nî ooigire atî mûrûgamo waake ûkoniî Amerika kwanjia mbaara Iran îrîa îraathiî na mbere o na rîu, ndûhanaine na wa mûnene wa bûrûri. Na kwoguo nî kîhooto we atige wîîra.
Ikuundi iria itetagîra Israel no Mathing’îrîrie Trump
Kent akiuga atî Iran ndîkoreetwo îrî ûgwati harî Amerika, nî oongereire atî, Israeli na ikuundi iria imîtetagîra (lobbyists) nîo maathing’îrîirie Trump atharîkîre Iran mûthia-inî wa Mweri wa Keerî.
Na no gûkorwo ûguo nîguo kûrî toondû, thuutha wa Kent gûtiga wîîra, gîkuundi kîmwe gîa icio gîîtagwo “Anti-Defamation League” (ADL), gîthûûkîrîirie ûhoro waake gîkiuga atî, marûa marîa aandîkire ma gûtiga wîîra me na kaûmbaguuthi ka mûtheemba karaiguîka; yaani ga kuonania ûrîa Kent ameneete andû a Israeli.
No we Kent ndareeciiragia atî ûhoro waake wa gûtiga wîîra no ûnenehio ûguo kûrooneka. We akiuga, nî maaririe na President Donald Trump ûhoro ûcio waake wa gûtua itua rîa gûtiga wîîra, na magîtigana gûtarî waao wî na marûrû.
Rîu thîîna nî atî, gûthiingatwo gûûkû kwa Joseph (Joe) Kent, kwahota gûtûma abithaa ûngî ûngîenda gûtiga wîîra thuutha ûyû eetigîre.
Ûguo nî ta kuuga, President Trump akorwo na maabithaa a hakuhî naake makîrutithania wîîra, no matiraamwîîra rîrîa mataranyiita mbaru mûrûûgamo waake. Ûguo nî ta kuuga no mamûthikîrîrie, no maatigana mageeka maûndû mûgarû. Agîkorwo na andû maraatûma akene, no atarî hakuhî mareeka kîîndû gîîtagwo “sabotage”, kana gûthûûkîrîria.