Minista wa Maûndû ma Thîinî ma Bûrûri na Waathani, Kipchumba Murkomen, nîarîîkîîtie gûtangaatha atî mûthenya wa rûûciû, Gataano, mweri 20 wa Gatatû, nî mûthenya wa kûhuurûka.
Aheanîîte rûûtha rûu arûûgamîrîire thirikaari, akîenda Aithîramu a Kenya magîe na kamweke ga gûkûûngûîra thigûkû ya Iindi kana Idd-ul-Fitr, na Aithîramu a thî yoothe.
Idd-ul-Fitr nî Thigûkû ya Kîî?
Idd-ul-Fitr nî mûthenya ûrîa arûmîrîri a ndini ya Gîithîramu makûûngûagîra mûthia wa Mweri Mûtheru wa Ramathaani, ûrîa makoragwo meehiingîîte.
Nî Aithîramu oothe Meehingaga?
O na gûtuîka kwîhiinga hiingo ya Ramathaani nî kwa Aithîramu oothe, nî kûrî aao meetîkîrîtio kwaga kwîhiinga.
Mûûndû woothe mûrwaru, kana nî mwîrî, kana nî meeciiria, ndaagîrîirwo nî kwîhiinga.
Niingî mûtumia woheete nda, ûroongithia, kana wî na thîîna ûngî o na ûrîkû ûkoniî mûûndû wa nja, nîmûhe rûûtha rwa kwaga kwîhiinga.
Ûngî wîîtîkîrîtio ndakehiinge nî mûûndû wî thabaarî-inî. Gîtûmi nî atî thabaarî ciî mînoga mîingî, na no itûme mwîrî waage hinya.
No o na harî o ûguo, mûndû ûngîaga kwîhiinga nî toondû wa kûhîngîîcîka thikû niini ta icio cia thabaarî, nîaheetwo kamweke ga kwîhiinga thuutha-inî arîhîrie thikû icio mwaka ûtaanathira.