Ali Larijani, mûthuuri ûkoreetwo na uuge mûnene bûrûri-inî wa Iran, nî arooragirwo ira mbaara-inî îno îraathiî na mbere gîcigo-inî kîa Gulf.
Larijani nî arakoreetwo oima mûciî-inî mûnene wa Iran, Tehran, ûrîa Amerika na Israeli makoreetwo magîtharîkîra na njîra nene ma, mateekûmaka nî kû na kû kûrî na mîciî ya andû a kawaida.
Kûreerîkana atî Larijani araarî mwena wa iraathîro wa Tehran, gîcigo-inî kîa waathani gîîtagwo Pardis (Pardis District). Arooete kamweke kau ataraarî waabici gûceerera mwaarî, na kwoguo arakuîrîire nyûûmba kwa mûirîtu waake.
Kaambûni îmwe ya ûmemeerekia Iran, Fars News Agency, yugîîte atî ndege cia mbaara mûtheemba wa njeti iraarîithanirie na Larijani, nginya iraatigîrîra nî ciamûriingîra kûrîa aratoonyire na arekiindîra, na nîkuo kûu kwa mwaarî.
O na mûnene wa gîkuundi kîîngî gîa thigari gîîtagwo “Basij force” nîarooragirwo o ira, na Israeli îreegana atî nîyo îramooragire me na Larijani. Rîîtwa rîa mûnene ûcio nî Gholam Reza Soleiman.
Bata Mûnene wa Amerika nî Thirikaari ya Iran îgarûrwo
Mûnene wa Amerika, Donald Trump, nîakoreetwo akiuga ûrîa areenda thirikaari îrîa îrî kuo Iran îgarûrwo. O na nîakoreetwo agîcoocera andû a Iran magoomere thirikaari yaao na moimîre meeke maandamano.
Mîaki îno ya kûharagania ûtoongoria wa Iran nîyo yaatûmire mûtaratara wa mbaara waambîrîre na kûhîta na kûûraga atoongoria. Mûnene wa kîîndini, Ayatollah Ali Khamenei, agîkîambîrîrwo me na maabithaa a hakuhî arîa maarî nao wabici-inî ciake o rîîrî mbaara yaanjia.
Atoongoria angî a mbirarû magîcookererwo. Na gûgîthiîte o ro ûguo nginya mûthenya wa Larijani ûraagîkinya.
Kûûragwo kwa Larijani ti Kuuga Mbaara nî îîgûthira
Larijani araarî mûûndû wa mûrûûgamo mûkaari, na nî ûhûthû nî mareekîranaga hinya na mûtoongoria mwerû wa kîîndini, Ayatollah Mojtaba Khamenei, harî gûtua itua rîa gûthiî na mbere na mbaara matekûgûûagûûa.
No to mûhaka maûndû magarûrûke rîu. Nî weega kûririkana atî mwathanîre wa Iran ndûhaana wa mabûrûri ma athûûngû, o na kana maya maangî marigainie ma Gulf.
Ta rîu o na Iran îrî na mûtoongoria wa gûthuurwo nî raia, nîwe Masoud Pezeshkian, na o na îrî na mbuunge, jeshi ya Islamic Revolutionary Guard (IRG) îrî uuge mûnene mûno waathani-inî wa bûrûri.
Mwaka-inî wa 1979 rîrîa Shah Reza Pahlavi aamunyirwo gîturwa-inî na Ayatollah Khomeinî akîoya ûtoongoria, jeshi îno ya IRG nîyo yarûûgamîrîire Khomeinî nginya agîîkiindîra weega. Ûmûûthî, no yo îrûgamîrîire na îkagitîra ûtoongoria wa Mojtaba, mûriû wa Ayatollah Khamenei, o ûrîa îraatûire îrûûgamîrîire ithe ataanoragwo. Na gûtirî ûndû ûkoniî mwathanîre wa Iran ûûngîgarûrwo nî andû a Iran, jeshi îno îteetîkîrîîte.
Ûndû ûngî nî atî, Larijani nî arendeete mûno gacîra ka iria-inî ka “Strait of Hormuz” gaikare kahiingîîtwo o ro ûguo karî. Gîtûmi nî toondû nî itharaita rîmwe rîega rîa Iran. Kûgiria maguta mahîtûke makinyîre athûûngû nî gûtûmîîte bei yaamo thoko-inî ya thî îhaice. Mbei ya itaangi rîmwe îraathakîra ndoora igana ($100), na ataaramu maroiga atî mbaara îno îngîniina ciumia ingî ciigana ûna, mbei no îkinye ndoora igana rîa mîroongo îtaano ($150).
Iran îgakîmenya atî haandû haaha, Trump eekûnegenio nî andû ake kûûrîa Amerika nîûndû wa ucuumi gûthûûka, na eerwo arîîkanie na mbaara îno nî ya haathara.
Kwoguo ûrîa kûrî nî atî, Iran îtaniinîîte matharaita, jeshi ya IRG îgûthiî na mbere kûriinga ûtoonga wa mabûrûri ma Gulf, na gûikia makomboora Israeli, o ta ûrîa îkoreetwo îgîîka.
Ta rîu Njuumatatû, yaikirie makomboora Kîhaaro-inî kîa Ndege kîa Dubai, gîkîhiingwo mathaa mûgwanja.