Iran îreenda mûtoongoria wa Amerika, Donald Trump, atige kûheenia andû. Mûkaana ûyû ûraarutirwo nî Minista wa Maûndû ma na Nja wa Iran, Abbas Araghchi, akîhinyîrîria atî Iran nî îîharîirie gûthiî na mbere kûrûa mbaara îno Amerika na Israeli maanjîrie.
Minista ûcio oigire ûguo thuutha wa Trump kwîra ameemerekia a mohoro atî we nîareganîîte na ihooya rîa Iran, atî Amerika na Israeli marûûgamie mbaara. Araghchi agîkiuga atî, gûtirî haandû Iran îhoete ihooya ta rîu.
Iran Yuugîte Trump nî wa Maheeni
Kûrooneka ta kweeri Trump aheenanagia. Mwaria wa Ministrî ya Maûndû ma na Nja ya Iran, Esmail Baghaei, o naake nî araakoretwo oona ta mûndû ataagîrîirwo nî gwîtîkia ûndû Trump oigîîte. Ûguo nî toondû, tûthikû tûniini mbere ya mbaara îno ya Iran yaanjie, Trump oigire aanîrîire atî Iran nî îcookereire ûthoondeki wa matharaita ma “nuclear”. No Baghaei akiuga gûtirî ûndû ta ûcio ûraathiî na mbere.
Iran nî îkoreetwo îkîrorwo kwa mahiinda nî ikuundi cia thî iria ikonainiî na maûndû ma “nuclear”, na îkooneka gûtirî ûndû îreeka wa kuuna waatho. O na nginya icaikuhî, mweri wa gatatû mwaka mûthiru wa 2025, mûnene wa gîteengo kîa ûhûûngi wa ûhooro kîa Amerika (Director of National Intelligence), Tulsi Gabbard, aaribooteire mbuunge ya Amerika atî, kuuma Iran yaatigana na mûraandi wa gûthoondeka matharaita ma “nuclear” mwaka-inî wa 2003, ndîrî yaûcookerera.
Rîu kûrooneka ta Trump aathûûkagîria Iran rîîtwa nî getha athaakîre andû hakiri. Nî getha aanjia mbaara îrîa aacoraga hîîndî îyo me na Netanyahu, andû moone kweri nî harî na kîhooto kîa mbaara îyo.
Trump e na Wagaagu
Kûrooneka ta Trump e na waagaagu toondû Iran nî îîrûmîîtie ûrîa ataataanyîîte. Kiumia gîthirû, nî arahoire mabûrûri ma rûraaya ta Ngeretha, Baraanja, na maangî, o na nginya China, matûme meeri ciao cia mbaara maaî-inî ma gîcigo-inî kîa Gulf, iteithîrîrie gûtuunya Iran ûramati wa gacîra ka maaî-inî ka Hormuz.
Mabûrûri macio matiigana kûmûcookeria. Nginyanagia ûûmûthî, no eetereire aanja.
No mabûrûri maya matiingîaga kûririkana atî, Trump akîanjia mbaara îno ciumia igîrî na nuthu thiru, ndaigana kûmahuutîria. O na ndaigana kûgwetera kîama kîa mabûrûri kîrîa gîkonainiî na maûndû ma mbaara na ûgitîri kîa NATO.
Na gûthûûkia mûno, ndeerire o na mbunge ya bûrûri waake ya Congress. Gwakinya hau rî, andû magakiuga o nake Trump rîu nîeriingie nî rwa nyaarîrî.