Raisi wa Iran nî araaririe mûtandao-inî mûthenya wa îtatû kiumia gîîkî, araandîka maûndû matatû marîa maangîtûma Iran îtigane na mbaara îno îraathiî na mbere.
1)Iran îheeo gîtîîo na ûhuuru waake ûrîa waagîrîire
2) Iran îrîhwo haathara ya mbaara îno
3) Kûrutwo mûkaana mûkiindîrîku ûraamenyeka thî yoothe, wa kuuga atî Iran ndîgaakorio mbaara ta îno rîngî.
No mbaara no îraagîthiî o na mbere kamûira kau, o na îkamata mûno, Iran manyiitanîire na gîkuundi kîa Hezbollah.
Israeli o nayo ndînyihîîtie mbaara
O na Israeli îkîhûûmagio nî Iran na Hezbollah, mbûtû ciayo no ithiîte na mbere na mbaara. Nîikoreetwo cierekeirie haaro mûciî mûnene wa Lebanon, Beirut. Na nî weega kûririkana atî bûrûri wa Lebanon nî mûraata wa Iran.
Israeli îcookete îkanyiitanîra na Amerika, magakorwo magîikia makomboora kûûndû kûingî Iran; yaani mbaara ndîrî o Tehran tu.
Pezeshkian nî maraaririe na Raisi wa Russia na Mûnene wa Pakistan
Raisi wa Iran atanaandîka maûndû marîa mekwendwo mahiinge bûrûri waake ûtaanatiga mbaara rî, nî arambîîte kwaria na Raisi Vladimir Putin na Waziri Mûnene Shehbaz Sharif.
Pakistan na Iran nî marigainie mweena ûmwe, na andû aingî a mabûrûri maao nî Ithîramu. No haarî o ûguo, Pakistan no yeende mbaara îthire toondû nî kûrî andû aingî mûno a Pakistan marutaga wîîra mabûrûri-inî ma Gulf. O na niingî kûu Gulf no kuo Pakistan îrutaga maguta.
Russia nayo na Iran nî mabûrûri meerî matîanîîte. Ningî o meerî nîmooî ruuo rwa gwîkîrîrwo mîkaana ya kîîbiacara nî mabûrûri manene ma ithûîro (the West). Hîndî îrîa gwatuîka gûtirî bûrûri waagîrîirwo nî kweenderia Iran kîndû o nakî, ucuumi wa Iran no mûhaka ûthûûke. Na Russia yaanakorwo haandû ta hau o nayo; nginya o na ta kuuma yaanjia mbaara ya Ukraine.
No gûkîrî o ûguo rî, mbûtû cia Iran ikîrîrîirie gwîkîra mbaara îno mwaki, ikarûa ta itakaarûa rîîngî. Gîtûmi nî toondû iraarûa kûrîhîria kûûragwo kwa mûnene waao wa kîîndini, Ayatollah Ali Khamenei.