Kûrî mûthenya wa Ira, Gatatû, waabici Nene ya Amerika kûûrîa Dubai, nîyo “Consulate” (mûtheemba wa “Embassy”), nî îraakong’oririo nî Iran na matharaita ma mûtheemba wa ndirûûni. Kûraatuîka ndirûûni îyo îragûire o ro nja harîa andû maigaga ngaari ciao getha matoonye waabici; yaani “parking”.
Kûriinga thî ûguo, no kûripuka îraaripukire o hau hau. Mwaki ûrakîrîrîîmbûka, nayo ndoogo îraiyûra rîera-inî yoonagwo nî andû me kûraihu mûno. Weega nî atî, kûraatuîka gûtirî mûndû ûrakorereirwo nî mûtino ûcio waabici. Amerika nî îrîîkîîtie kwaria na aruti aake a wîîra, konsiurîîti-inî îyo, na îkamenya o harîa o mûndû o mûndû arî.
Amerika Kwîra Andû aake Meethare
Waabici îyo îraatuthûrirwo Dubai gûtarî na ngaanja ndîîngîthiî na mbere kûruuta wîîra ihiinda-inî rîîrî. Andû rîu nî meethare. Na tayaarî Amerika nî îrîîkîîtie kûhiinga mawabici maangî maayo matatû ta macio mwena ûcio wa Gulf nîûndû wa ûgitîri.
Ûhoro ûrîa ûraagia andû arîa me kûu a Amerika nî rîîrî: Mekûinûka na kî o na meerwo meethare? Rîera (“angani”) mwena ûcio woothe wa Gulf nî ihiinge, nîûndû wa ûguo Iran îraikia makombora Dubai, UAE, na tûmabûrûri tûu tûûngî twa Arabu tûrî ûraata na Amerika. Kwoguo ndege itiraathiî.
Amerika îrakorereirwo îîrigîtwo
Rîrîa mûtoongoria wa Amerika, Donald Trump, oonire kamweke keega ga gûkoria Iran mbaara, aakenire akîaga gwîciiria ûhooro wa andû aake arîa me mabûrûri-inî mang’ethanîire na Iran.
Iran îrî mweena ûmwe wa iriia rîa Paacia (Persian Gulf), namo mabûrûri maya maangî ta Oman, Saudi Arabia, UAE, na maangî, marî mûrîmo ûcio ûngî.
Ûgwaati ûrîa Trump oonire kabere nî wa andû a Amerika arîa makoragwo Iraq, bûrûri ûngî ûrî waakorio haaro nî Amerika; Lebanon, bûrûri ûrî ûraata na thû ya Amerika îîtagwo Syria; na wa thigari cia Amerika ikoragwo ciikarîîte icigo imwe cia Syria.
Ûguo nî ta kuuga atî, andû a Amerika arîa makoragwo Baghdad, mûciî mûnene wa Iraq, Beirut, mûciî mûnene wa Lebanon, na Herbil, mûciî ûrî mwena wa rûgoongo wa Syria, nîmaahotire kwîmunya haaro îtaananjia, na ndege itaanahingîrîrio kûûmbûkîra kûu.
Minista wa Amerika, Marco Rubio, oigîîte Iran nî îmacoreire ûndû matareeciiragîria
Thuutha wa waabici nene ya Amerika kûûrîa Dubai kûringwo o ûû weega nî Iran, nîguo Marco Rubio arahithûririe atî o matireeciiragia Iran no îmarûmîrîre bûrûri-ini ta Dubai. Me na Trump nî ta maariganîirwo atî ruunagîra harîa hahûthû.
Rubio arûmîrîrio ciûria nyingî nî aandîki a mohoro, ndaneenda kwaria mûno. Arameera atî ciûria nyiingî ikoniî mbaara îno, iingîcookio weega nî wizara ya mbaara, îrîa tene yeetagwo wizara ya ûgitîri.
Rîu andû a Amerika arîa me mwena ûcio wa Gulf, no mûhaka makirîrîrie nginya mabaangîrwo ûrîa meekwîmunya kûgerera kamûbaango ke ho ka thirikaari ya UAE.
Thikû ciigana ûna thiru, UAE nî îrathoondekire gacîra mareeta “safe corridor”, ga gûteithîrîria kûhiingia mabata ma hi na hi, ta kûinûkia ageni arîa mahiingîrîirio kûu îîria ya Gulf.