Amerika na Isiraeli nîmatuthûrîîte haaro makoreetwo makîmereria mata kahiinda karaaya, ya gûtharîkîra bûrûri wa Iran.
Ûguo nî ta kuuga o na mîario îraathiaga na mbere kiumia gîthiru kûûrîa Geneva, mûciî mûnene wa Switzerland, ndînagîa na uumithio. Gûgîkinya mûthenya wa kana mîario nîyaharaganîîte.
Amerika ndîendaga kûigua ûndû ûngî tiga ûrîa yo îreenda
Hîndî ya mîario îyo ya kûgeria kûiguithania mîrûgamo ya Iran na ya Amerika, ûrîa ûranyiitithanagia mîena îyo yeerî nî gîkuundi kîa andû anene thirikaari-inî ya Oman, gîtoongoretio nî Minista wao wa Maûndû ma Na Nja. Ûguo nî ta kuuga gûtirî hîîndî Trump na andû aake ta Minista Marco Rubio, maraikarire metha îmwe na gîkuundi kîa Iran.
Netanyahu na Trump Kweri nî Mareendaga Kûiguithania na Iran?
Kûrooneka ta atoongoria a Israeli na Amerika mataraarî na bata wa kûiguithania na Iran. Wa mbere, hîndî îrîa mîario ya kûgeria kûmaiguithania na Iran îraathiaga na mbere, Netanyahu araiguîkaga thî yoothe akiuga ûrîa ehaarîirie kûgûtha Iran na matharaita ma gûikîrio kûraaya (missiles).
Trump naake no kûhaarîria arahaaragîria mbûtû ciake kwanjia haaro kûrî Iran icaikuhî.
Gûgîkîa Njuumamothi, Iran Yaiguire o Yaaringwo
Kûrî Njuumamothi mweri mîroongo îîrî na inyaanya, Amerika na Isiraeli no kwanjia maanjirie mbaara.
Makîerekeria matharaita ma gûikio kuuma kûraaya harî igaanda cia Iran cia gûthoondeka matharaita ma nuclear. O hîîndî îyo makîgûtha gîikaro kîa mûnene wa kîîndini wa Iran, ûrîa arî we ûkoragwo na kiugo kîa mûico kûu, uretagwo Ayatollah Ali Khamenei. Ûcio agîgîkua hau hau me na atoongoria angî maarî nao.
Raisi wa Iran Akoreetwo na Thîîna na Andû Ake
Raiya ya Iran nî îkoreetwo îgîteta nî garama ya mûtûûrîre, na kûigua maûndû ma o mûthenya nî maritûhire mûno. Nîûndû wa ûguo, kûrî mûico wa December mwaka mûthiru, no kuumîra moimîrire mîtaa-inî. Yaani magîthiî maandamano.
Ayatollah Khamenei, ûrîa ûroîkaine nî gûkorwo e mûkaari mûno, akîîra Raisi wa Iran ûrîa wîtagwo Masoud Pezeshkian, ndagaathaithe mûndû. Atî mûndû wî maandamano-inî ariingwo biû kana arathwo mûciinga.
Andû a Iran magîkîhorerio mîtaandao ya internet, na maandamano namo, marîa maataambîrîire nginya January ya mwaka ûyû, makîharaganio na njîra njûru mûno. Pezeshkian aatûmire jeshi îkaharaganie maandamano macio.
Amerika Nîyaakîonire Kamweke ga Gûcogotha Iran
Amerika na Israeli moona Rais Pezeshkian e na thîîna bûrûri-inî waake, nîho Trump na Netanyahu meeranire nî hîîndî njega ya kûmûtwarîra haaro. No magîkîamba gwîtua me na bata wa kwaranîria maiguithanie.
Rîu thî yoothe îîroreire gîcigo kîu kîûîkaine ta Middle East, yoone ûrîa haaro îno îgûthiî.
Nî weega kûririkana atî bûrûri ûyû wa Arabu wîtagwo Iran, nî ûmwe wa mabûrûri marîa meendagia maguta maingî mûno thî yoothe.
Ûndû ûngî nî atî, bûrûri wa Russia, ûrîa naguo ûkoreetwo ûgîtoongorio nî mûndû ûngî ûhaana ta eendete haaro ta ûcûrû wîtagwo Putin, nî ûrî maguta maingî wendagîria mabûrûri maangî. Naguo ûkoretwo na mbaara na bûrûri wa Ukraine mîaka îraakinya o îna.
Mbaara ici cingîthiî na mbere ûguo, maguta maahota kûnyiiha thoko, mahaice thogora, nayo thî yoothe îritûhîrwo nî maûndû maingî. No nî tûgweeterera tuone kana Amerika marî na bûrûri ûyû wa Ayahudi ûgwitwo Israeli, nîmekûrîîkania na haaro îno na ihenya.