Gabana wa Nairobi, Johnson Sakaja, nî eethûkîirie gîsiasa nî gwîtîkîra kaûntî yaake înyiitanîre ûramati na thirikaari nene?
Mweri wa ikûmi mwaka mûthiru, Sakaja maarûgamire hamwe na Mûnene wa Bûrûri, William Ruto, magîtaangatha atî nîmaiguithania maramate Kaûntî ya Nairobi me hamwe.
Aakenya aingî makîona ta arî Sakaja na mbûtû yaake ya atoongoria îraatuunywo maahinya. No we Sakaja agîtetera ûnyiitanîri ûcio, akiuga atî gûteithîrîrio ti ûûru tondû o na kaûntî no îkwongerwo mbeeca.
Mawîîra marîa Thirikaari Nene Yacaagûrire nî Marîa Moonanagia Weega Ûtiganu wa Nairobi na Kaûntî ingî
Mawîîra marîa maatuîkire mateithanio nîmo maya:
- maaî
- mabarabara, ndaraca na mîtaro ya maaî ma mwaraho
- ûtheru wa nja na ûûngania wa gîko
- waaki wa nyûûmba cia gûikarwo na maendereo ta macio.
Gûteithania gûûkû gûkîrorwo ûguo no kuoneke ta gwî kwega, kwanja nîûndû nî haragweetwo mbeeca thirikaari nene îkuongerera mawîîra-inî maya. No rîîrî, tondû kûriingana na maûndû ûrîa maikaire no mûhaka akorwo mbeeca ici nî cia gûkoombwo rî, ithî ti kaûntî îgaatigîrwo mûrigo wa kûrîha thiirî ûcio?
Ûnyiitanîri ûrîa weerirwo Rîu Nî Mwîkîre Mûkoonde
Kûrî mûthenya wa keerî kiumia gîîkî, mbunge ya kaûntî ya Nairobi nî îrahûûrire mûhûûri na njîra ya ûingî, ûnyitanîri wa kaûntî yaao na thirikaari nene. Ûguo nî ta kuuga atî, nîmareetîkanîirie na ûrîa Ngavana Sakaja na CS Mûnene, Musalia Mudavadi, metîkanîirie mweri mûthiru, atî Kaûntî ya Nairobi yaamûkîre ciriingi mbirioni mîroongo înaana (sh.80 billion) cia kûgaacîrithia Nairobi na njîra mwanya mwanya.
O mûthenya o ûcio rî, nî kûraarî na mûbaango wa kwandîkithia mateta makoniî Ngavana Sakaja.
MCA a Nairobi Mareenda Kûbuuta Ngavana Sakaja
Mûtoongoria wa mwena ûrîa wî na ma-MCA aniini mbunge-inî ya Nairobi, Waithîra Chege, nîareerire aandîki a mohoro atî ma-MCA nîmatuîte itua kûruta Ngavana Sakaja gîtî-inî. Aroiga atî marakuuîte marûa marîa maagîrîire, me tayarî kûmanengera Mwandîki wa Mbunge thaa inyaanya. No maraagîkorire ndarî wabici na ndaranyiitîka. Waithîra arakiuga atî, riita rîîrî, Sakaja ndekwîrica tondû o na nî moonganîtie irore cia kûigana. Aroiga atî, me na mûharaandî wa mateta makoniî Sakaja makinyîîte o mîroongo îîrî na meerî (22).
Mwaka mûhîtûku, MCA a Nairobi no meendaga kûbuuta Sakaja, no agîteterwo nî Mûtoongoria wa Bûrûri, William Ruto, me na mûtoongoria wa mûng’ethanîro wîîrîga kûhuurûka, Raila Odinga.
Kahiinda-inî gaaka, kûrooneka ma-MCA matirî na wasiwasi kûnyiitanîra na thirikaari nene mawîîra-inî macio maagwetirwo ma mabeeca maingî, no Sakaja ndagakorwo ikuhî.
Hiihi no Akorwo Ûhoro ûyû Woothe nî Kamûbaango Gakoretwo Gacoretwo?
Rîrîa ûhoro waiguîkire atî Nairobi îreendwo înyitanîre na thirikaari nene, Aakenya aingî nîmaiguire njiriiri.
Kîûria nî atîrî:
- Sakaja we nîaiguire njiriiri? Kana hiihi eîraga aanyita mûnene wa bûrûri mbaru nîekûhonoka kûbuutwo nî ma-MCA (impeachment)?
Kîûria kîîngî nî atîrîrî:
- Ruto na Raila makiuga Sakaja atiganwo naake mwaka ûcio ûrathirire rî, nî kuona moonete no aceenjie mûrutîre waake wa wîîra wagaagîre? Kana meendaga aikare o hau gîtî-inî, ateithîrîrie mûbaango ûyû wa thirikaari nene gûtoboka maûndû-inî ma kaûntî?
O ûrîa arî guo rî, maitho ma Aakenya rîu meerekeire o kaûntî ya Nairobi. Mûndû akeyûûria:
- Sakaja akûûrwo gîtî-inî rî, nî gûûkûgîa na gîthuurano kîniini, gûtigarîîte mwaka na nuthu ûguo gîthuurano kînene gîkinye?
- Kana kûmunywo gwake gûkûhe thirikaari nene kamweke ga kûûmba gîkuundi kîa waathani, kana komicooni ta îrîa yaarî kuo mwaka wa 2020 yeetagwo NMS?