Pastor Dorcas: Weega Uumaga na Mūciī

Pastor Dorcas Gachagua nī atītīrithītie atī weega uumaga na mūciī. Aroigire ūguo arī Wamūnyoro, akīnyiita ūgeni gīkuundi kīrathiīte gūceerera mūthuuriwe, nīwe Rīgathī Gachagua, ūrīa waarī mūniini wa President kuuma 2022.

Aracokeirie gīkuundi kīu kīroimīte Mūrang’a ngaatho nīūndū wa gūkorwo manyiitīrīire Rīgathī Gachagua, mūno mūno kuuma ahagūrwo gītī-inī kīa “Deputy President”.

Akīenda kūmathekia haniini na gūtūma maigue marī mūciī, arameerire nīwe wīting’ūragia mūciī ūcio. Na arakīmaririkania atī we aaciarīirwo Mūrang’a haandū heetagwo Kariara, kwoguo we nī ūmwe waao.

Pastor Dorcas Gūcookeria Atoongoria a Mūrang’a Ngaatho

Mrs. Rīgathī nī aracokeirie Senator wa Mūrang’a na atoongoria acio angī ngaatho, tondū matirī maarekia His Excellency Rīgathī Gachagua.

Wiikendi īno īraathirire rīrīa araamūkīrire atoongoria me gatū Mūrang’a ta Ndindi Nyoro, arameerire atī nī etīagīra gūkorwo aciarītwo kūu Meetumi.

Pastor Dorcas araririkanire hīndī Rīgathī na arūmīrīri ake a DCP matharīkīirwo mīena īyo ya Mūrang’a. Na aroiga atī andū aingī a kūu nī meyuumīririe kūmagitīra.

Gīikaro kīu kīraarī Wamūnyoro nī kīrookīītwo nginya nī atoongoria a īīria īyo, ta Mūhecimiwa Mūrīu. Pastor Dorcas ataanatigīra His Excellency Gachagua kamweke ga kwaria, nī araraathimithirie ageni acio oothe. Aroiga Ngai amaraathime nginya na bamīrī ciao.

Mūrang’a nīkīo Kīhumo: Rīgathī Kuuga

Rīgathī nī aranyiitire ūgeni gīkuundi kīu gīa kuuma Mūrang’a. Na aroiga atī mbere nene nī atīīte Mūrang’a ta kīhumo kīa Mūūgīkūyū.

Aracooka arakīmeera atī Pastor Dorcas aroigire no mūhaka arūgamīrīre iruga rīa andū a Mūrang’a, handū ha kūmatigīra aruti wīīra. Arakīmathekia nī kuuga atī Pastor Dorcas nī mūūgī nī kwenda kūbaacīrīra maundū ma andū a kwao Mūrang’a.

Gītūmi nī tondū maūndū maangīhītana kwa Rīgathī Wamūnyoro, mūtumia waake angīūrīra o Mūrang’a.

Pastor Dorcas Ndangiuma Wamūnyoro

We Mūhecimiwa Rīgathī nīaracookire aroiga atī gūtirī ūndū ūngītūma Pastor Dorcas oime Wamūnyoro, no nī weega ūguo aratīīa andū a kūrīa oimire.

Gachagua aragīcooka o nake aracookeria ageni acio a kuuma Mūrang’a ngaatho. Aroiga atī nīoī andū a Mūrang’a haandū maarūma nī a DCP.

Nīarakumirie ūtoongoria wa atoongoria arīa maraarī hau, nī ūrīa mahakikicīīte mwaki wa DCP ndūraahora Mūrang’a. Araakīmeera atī nokīo atoongoria amwe arīa makoretwo makirīīte rīu marooya ikinya na kūingīra DCP.

Niingī aroiga atī amwe aao o na nī meereheete Wamūnyoro, ta Governor Kang’ata. Nao andū matiingīriganīrwo atī Maina Wanjīgī nī eerīga Wamūnyoro, na o naake oimīte Mūrang’a.

Rīgathī nīaracokirie ngaatho nyiingī kūrī Senator Nyūtū na ambuunge ta Joseph Mūnyoro wa Kīgumo na Wakiri Edward Mūrīīu wa Gatanga. Aracookeirie ngaatho nginya mūmbuunge Chege njūgūna wa Kandara, ūrīa ūtaahotire gwīkinyia Wamūnyoro mūthenya ūcio.