Junior eyeing Embakasi as Oburu leads ODM.(FacebookPhoto)
Raila Junior nî eyuumîrîtie ûtheri-inî kîwaanja-inî gîa ûteti. Ûhoro wa Raila Junior gûtaanya gîtî kîa Embakasi ya Mûhuro nîgûtûmîîte ateti marorie maitho mwena ûcio.
Wa mbere, nîkûrî mûnjuumbe wa kuo wa Kîama kîa Wiper, wîîtagwo Julius Mawathe. Na no kûrî ateti a ciama ingî maangîenda gîtî kîu mwaka-inî wa 2027.
Raila Junior Ûteti-inî
Raila Junior nî mûrû-a-Raila Odinga ûrîa mûniini, Raila ûrîa wîîrîga kûhuurûka. Raila Odinga aatûire atoongoreetie mûng’ethanîro Kenya. Niingî Raila Junior, nî kaguuka ka Oginga Odinga, ithe wa Raila Odinga. Rîu niingî, Jaramogi Oginga Odinga nîwe waambîrîirie ûteti wa mûng’ethanîro Kenya. No aambire akîruta wîîra arî thirikaari-inî thîinî.
Mwaka-inî wa 1964 Kenya yaanjia kwîyaatha biû, Jomo Kenyatta atuîîkire Raisi, naake agîtua Jaramogi mûniini wake; Vice-President. No thuutha wa mîaka îîrî, Jaramogi akiuma thirikaari-inî.
Gîtûmi kîa Oginga kuuma nî atî mwonere waake wa ûteti nî waarî na ûtiganu na wa Kenyatta. Nî gwathiire ûguo Jaramogi akîûmba kîama kîîngî gîa ûteti, Kenya’s People Union (KPU), na makîmenana na Kenyatta.
O na agîgaakinya gûkua 1994, Jaramogi Oginga Odinga aarî o mûteti wî gatû mûng’ethanîro-inî.
No mwanake ûgwîtwo Raila Junior ndakoreetwo akîonania kûgucîrîrio nî ûteti. We akoreetwo agîîka o ta Nyina: kûnyiitîrîra ithe mîcemanio-inî na maûndû ta macio, atekwaria maûndû ma ûteti.
No nî ta maûndû magarûrûkîîte kuuma ithe ahuurûka nwaka mûthiru wa 2025. Wa mbere, kîama gîa ithe kîa ODM nî kîanjirie mathîîna na thogothogo cia thîinî.
Nîguo kûhoorere naarî haniini rî, ODM îkîamûra Oburu Odinga , mûrû-a-nyina na Raila, atoongorie kîama. Oburu nî ithe mûkûrû wa Raila Junior. Naake mwarî wa nyina ûrîa mûniini, Winnie Odinga, akîanjia kwaria mawooni maake ma kîûteti atekûhitha. No Winnie nî oonanîtie kwenda ûteti ta ithe o na ithe arî muoyo.
Nî ûhûthû maûndû macio, na maangî makoreetwo magîthiî na mbere ODM, nî macûûngîrîirie gûtûma Junior eende kûingîra ûteti-inî.
Raila Junior Gûtaanya Gîtî kîa Embakasi nî Kîambîrîria Kîega
Wa mbere harî mathoomo, Raila Junior ahaana o ta ciana icio ingî ciao. Yaani, oothe nî athoomu; Rosemary, Winnie, na mûrû-a-nyina ûrîa wahuurûkire, Fidel.
Junior arî ndingirii igîrî cia mathabu ma mbeeca cia kuuma Ngeretha: University ya Wales na ya Leeds. Ûguo nî ta kuuga e na mbachara na maathita.
Aarîkia gîthoomo na gûcooka Kenya, we Junior akiuga, nî aarutire wîîra wa mathabu (accountant), haandû ambîrîirio na mûcaara wa ngiri ikûmi.
Thuutha wa kahiinda, nîanjirie gûteithîrîria wîîra kaambûni-inî na biacara-inî cia bamîrî yaao. Gûgîthiianga ûguo, akîhiingûra kaambûni yaake. Gûgagîtuîka atî nîwe mwene kaambûni îmwe ya kûgaathîrîria indo îîtagwo Creative Hub. Rîu akîruutaga moothe: gûtwarithia kaambûni yaake na mbere, na gûteithîrîria biacara cia bamîrî nene ya Raila.
Kûûngîthiî ûguo Junior ahootane 2027 na atuîke MP wa Embakasi South, no ateithîke mûno kîûteti. Mûno mûno, ateti me gatû nî ûhûthû macaranie naake makîenda akorwo hakuhî nao, nîûndû wa rîtwa rîa baamîrî.
Na arî o nguruhano-inî icio, aahota gwîkora o haarîa gatagatî biû ga ûteti wa Kenya.