Jude Bellington who scored in England vs Norway (Photo courtesy of the FA)
Ngîîmu ya England vs Norway îraanjirie thaa thita hwaî, na îkîrîîka, Ngeretha nî îraingîrîîte “semi-final” cia mûbiira ûyû wa “World Cup”. Îraingîririe Norwî ngooru igîrî, nayo Norwî îreetetera na îmwe.
Ûrîa Ngooru cia England vs Norway Iraingîririo
Mûthaaki wîîtagwo Andreas Schjelderup wa Norway nîwe ûraingîririe ngooru ya mbere ya mûthaako ûcio wa hwaî. Nayo îraingîrire ndagîka-inî ya 36. No îgîkinya ndagîka ya 45, Ngeretha nî îraigananîîtie.
Jude Bellington nîwe ûraingîrîirie Ngeretha ngooru îyo ya mbere, na kuuma hau tiimu icio no mburîîki irathiire.
No ciacooka kîhaaro, tiimu cierî ireemenyereire mûno itikaingîrio ngooru. Na eeroreri a mûbiira kîwanja-inî kîu kîa Mayami (Miami) maragîîkîra ûira atî, Ngeretha na Norwî maniina ndagîka 90 maiganaine. O ta mûtugo mûbiira-inî, England na Norway nî marathiire “extra time”, kana ndagîka cia mbaciici.
Hau nîho Bellington o ûrîa wa England araingîririe Norway ngooru, ndagîka-inî ya gatatû. Ûguo nîguo tiimu ya Ngeretha îraarutire Norwî 2:1, kîhaaro-inî kîu maita maangî gîîtagwo “Hard Rock”.
Ûhoro wa Tiimu Ici Cierî Hau Kabere
Wa mbere, Ngeretha yaakinyire “semi-final” rîa mbere mwaka-inî wa 1966. Îgîîkîra mbindii nginya îkîingîra “World Cup Finals”, na îgîciinda gîkoombe.
No mîaki ya kûhootana nî ûhûthû yoimanîîte na gûkorwo atî World Cup ya 1966 yathaakagîrwo Ngeretha. Ngeretha yacookire gûgaakinya “semi-finals” rîîngî 1990 na 2018.
Ûndû wa magegania nî atî, Norwî ndîrî yaakinya “World Cup semi-finals” o na rî, o na toondû yahûûmia Ngeretha ûguo. O na “quarterfinal” cio nyene îraakinyire rîa mbere hîîndî îno.
No ûguo ndûûnagiria tiimu îyo îinûkie Brazil kiumia gîthiru. Brazil nîyo tiimu îrîa îkuuîte gîkoombe kîa mûbiira wa FIFA maita marîa maingî mûno gwî ciothe. Îhootanîte maita mataano (5 World Cup wins). No Norwî nî îramîhootire hîîndî ya mathaako ma tiimu 16 . Îramîhûûra 2:1. Na toondû kûraakîrî gîteengo kîa “knockout”, Brazil no kuuma îrakiumire mûthaako-inî.
Rîu Atîa, Thuutha wa England vs Norway?
Ûmûûthî ûtukû kûrî na ngîîmu ya Anjentina na Thwitharaandi. Thaa ikûmi gûgîkîa Kenya, nîguo Switzerland vs Argentina îkwanjia. Ûguo nî ta kuuga kûrîîkorwo arî 01:00 GMT.
Îno nî ngîîmu ya mûico ya 2026 World Cup quarterfinals, na tiimu îrîa îgûciinda îkûingîra “semi-finals”. Mûciindi eetereirwo nî tiimu ya Ngeretha, magathaaka nayo Gatatû ga kiumia gîîkî kîrooka.
Wa Keerî naguo tiimu cia Baraanja na Thubîini nîigaakorwo ciaciindana. Na îyo îgaakorwo îrî “semi-final” ya mbere.
Tiimu îrîa îkahootwo ngîîmu-inî ya mûthenya wa Keerî na wa Gatatû, nîigaciindana Njuuma ya mweri 18. Na hau nîho hakooneka Namba Ithatû harî maciindano maya ma 23rd FIFA World Cup. Mûthenya ûyû ûngî, 19/07/26, nayo baino îthaakwo.